CMF, брендот на Nothing, ги претстави своите први преносни Bluetooth звучници, Speaker S и Speaker M. Новите модели се разликуваат по големината и аудиосистемот, но делат повеќе клучни функции, меѓу кои IP68 заштита од вода и прашина, Bluetooth 6.0 и батерија со декларирана автономија до 18 часа.

Помалиот CMF Speaker S е наменет за полесно носење. Има 45-милиметарски драјвер со цел опсег и два пасивни радијатори, со излезна моќност до 10 W RMS. На куќиштето има точка за прикачување ремен или карабинер, што го прави попрактичен за патување и активности на отворено.

CMF Speaker M е поголемиот и помоќен модел. Тој комбинира посебен вуфер од 25 W и високотонец од 10 W, за вкупни 35 W RMS. Според спецификациите, неговиот систем треба да понуди поизразен бас, почисти високи тонови и подобра раздвоеност на вокалите и инструментите. За разлика од Speaker S, овој модел има вградена рачка за носење.

Двата звучника користат Adaptive Tuning, функција што го приспособува звукот во текот на репродукцијата за побалансиран резултат. Преку апликацијата Nothing X се достапни четири еквилајзерски поставки: Balanced, More Bass, More Treble и Voice. Достапни се и UltraBass за понагласени ниски тонови и Wide Soundstage за поширок звучен впечаток.

CMF вклучува повеќе начини за поврзување. Покрај Bluetooth 6.0, звучниците поддржуваат NFC, Google Fast Pair и Microsoft Swift Pair, како и аудио преку USB-C. Може истовремено да бидат поврзани со два уреди, со што се олеснува префрлањето меѓу, на пример, телефон и лаптоп.

Можно е спарување на два исти модели во стерео-режим, додека Party Mode базиран на Auracast овозможува синхронизирање звук со повеќе звучници, вклучително и модели од други производители. CMF наведува дека Party Mode поддржува до 10 звучници.

Интересен дел од дизајнот се заменливите предни панели и повеќенаменските ротирачки контролери. Компанијата планира да објави датотеки за корисниците да можат да изработат сопствени 3D-печатени варијанти. Speaker S и Speaker M се достапни во бела, темносиво, портокалова и тиркизна боја, по цена од 59, односно 109 долари.