Американските воздухопловни сили успешно изведоа воздушен тест во кој пилот на борбен авион F-22 Raptor му задавал тактички задачи на беспилотно летало Anduril YFQ-44A Fury во услови на симулирана воздушна борба.

Тестот е дел од програмата Collaborative Combat Aircraft, чија цел е беспилотни летала да бидат вклучени во ескадрилите со борбени авиони со екипаж. Наместо пилотот директно да го управува секое движење на леталото, тој испраќал команди на повисоко тактичко ниво. Fury потоа ги претворал во конкретни задачи и маневри потребни за постигнување на зададениот резултат.

Таквиот пристап треба да го намали дополнителниот товар врз пилотите на борбените авиони. Тие истовремено треба да управуваат со сопствениот авион, да следат податоци од сензори, да проценуваат закани и да носат одлуки за употреба на оружје. Поради тоа, непосредното управување со уште едно летало во текот на борба не е практично.

Во потенцијално сценарио, пилотот би можел на беспилотниот придружник да му довери задача како надгледување или дејствување против непријателска противвоздушна одбрана, додека F-22 се концентрира на главната мисија, вклучително и пресретнување непријателски авиони.

Сепак, успешната интеграција на командите претставува само една етапа пред евентуалното оперативно користење на вакви летала. Програмата допрва треба да ги утврди границите на тактичката самостојност на дронот, безбедното управување со летот и правилата за одобрување употреба на оружје. Овие функции треба да поминат одделни тестирања.

Воздухопловните сили ќе треба да ја проверат и работата на беспилотниот авион во услови на електронско попречување, како и неговото однесување кога комуникацијата со пилотот е прекината. Покрај летачките способности, потребно е решение и за одржување, сервисирање, ракување со вооружување, распоредување и операции од напредни бази со ограничена инфраструктура.

Намерата е ваквите беспилотни придружници да го зголемат капацитетот на авионите со екипаж, овозможувајќи еден пилот да координира повеќе летала со пониски трошоци во споредба со формација составена исклучиво од борбени авиони со пилоти.