Суд во американската сојузна држава Ново Мексико ѝ наложи на Meta да плати 25 милијарди долари граѓанска казна, по спор што произлезе од прашањата за приватност и практиките на Facebook по скандалот со Cambridge Analytica.
Постапката почна во 2021 година, а во септември порота во Санта Фе утврди дека Meta ги довела во заблуда корисниците во Ново Мексико. Случајот не бил насочен директно кон преземањето податоци од страна на Cambridge Analytica, туку кон изјавите на Facebook во текот на годините за заштитата на корисничките податоци, поставките за приватност и справувањето со дезинформации и говор на омраза.
Поротата утврдила повеќе од 43 милиони прекршувања на државниот Закон за нефер практики. Законот предвидува казна до 5.000 долари за секое прекршување, што би довело до вкупен максимален износ од околу 219 милијарди долари.
Судијата Френсис Метју сепак го намалил износот на 25 милијарди долари. Во одлуката биле земени предвид бројот на прекршоци, нивното повторување и времетраење, како и вмешаноста на високи раководители во Facebook. Судот оценил и дека ветената истрага на компанијата по скандалот не била ефикасна и дека погрешните претставувања биле намерни и систематски.
Канцеларијата на јавниот обвинител на Ново Мексико ја опиша пресудата како една од најголемите финансиски казни против корпорација во историјата на САД. Средствата од казната се наменети за образовниот систем во Ново Мексико, а износот ќе собира камата од 15 проценти годишно додека не биде исплатен во целост.
Meta најави жалба на пресудата. Од компанијата сметаат дека пристапот на јавниот обвинител би го отежнал работењето во државата и дека случајот се обидува да воведе нови правила за онлајн говор преку финансиска казна.
Ново Мексико не учествуваше во неодамнешната спогодба на Meta со речиси сите други американски држави за прашања поврзани со безбедноста на деца на интернет, што ѝ овозможи самостојно да ја води оваа судска постапка.