Discord подготвува промена со која содржината од неговите најголеми јавни заедници ќе стане подостапна преку веб-пребарувачите. Од 16 ноември, сите сервери означени како Discoverable Servers ќе добијат сопствени веб-страници со основни информации за заедницата, нејзин опис и прегледи на разговорите во јавните канали.
До средината на декември, пораките објавени во таквите јавни канали би можеле да почнат да се прикажуваат целосно и на овие веб-страници и меѓу резултатите на интернет-пребарувачите, вклучително и Google. Намерата е информациите што се споделуваат во големите Discord заедници полесно да се наоѓаат преку пребарување на интернет, слично како што денес може да се појави дискусија од Reddit.
Промената не се однесува на сите сервери на платформата. Таа е ограничена на Discoverable Servers, односно јавни заедници со најмалку 1.000 членови за кои не е потребна покана за приклучување. Приватните сервери, директните пораки и групните директни разговори нема да бидат опфатени со новата можност за индексирање.
Discord наведува дека при прикажувањето на резимеата и поединечните пораки нема да се појавуваат корисничкото име или аватарот на авторот. Сепак, објавениот текст од јавните канали може да стане видлив надвор од самата апликација, што може да биде важно за корисниците кои досега ги сметале овие разговори за потешко достапни преку обично веб-пребарување.
Администраторите на серверите што се дел од програмата веќе можат да исклучат поединечни канали од идното веб-присуство. И самите корисници ќе имаат можност да спречат нивните објави на Discoverable Servers да бидат индексирани. Поставката ќе биде достапна во делот Data and Privacy во корисничките поставки на Discord.
Во Европската Унија, Обединетото Кралство, Канада, Бразил, Австралија и Јужна Кореја, индексирањето на пораките од канали ќе биде исклучено по правило, во согласност со локалните регулативи. Корисниците во овие пазари ќе треба самите да ја вклучат опцијата ако сакаат нивните јавни објави да бидат достапни во пребарувачите. Корисниците тинејџери, пак, ќе бидат изземени и нема да можат да ја активираат функцијата пред да станат полнолетни.