Amazon ги ажурираше насоките за своите инженерски тимови, со порака дека поголемата употреба на алатки за развој не значи автоматски и подобра работа. Компанијата сака развивачите да се оценуваат според вредноста што ја испорачуваат за корисниците и бизнисот, а не според бројот на потрошени токени, измени во кодот или извршени ревизии.
Новите правила се насочени кон појавата наречена „токенмаксинг“ – намерно зголемување на употребата на вакви алатки за вработените да изгледаат попродуктивни на интерните контролни табли. Amazon предупредува дека ваквите показатели можат да бидат погрешни кога се одвоени од реалниот исход на работата.
Според компанијата, претворањето на потрошените токени и стапката на користење на алатките во формални цели може да создаде несакани последици. Меѓу нив се повисоки трошоци за пресметковни ресурси и посложен софтвер, што не се вклопува со стремежот кон поедноставни решенија.
Наместо тоа, Amazon предлага проценката да се темели на долгорочни резултати. Податоците за употреба и натаму можат да бидат корисни, но само кога се разгледуваат внимателно и во комбинација со други показатели. Компанијата посочува дека треба да се анализираат и тимовите што најмалку и оние што најмногу ги користат новите алатки, за да се утврди дали тие навистина ја подобруваат испораката на софтвер.
Во интерната белешка се нагласува дека улогата на развивачот не треба да се дефинира според тоа колку користи одредена технологија. Поважни остануваат инженерската проценка, познавањето на доменот и способноста да се создаде корисен производ.
Amazon додава дека не секоја задача мора да има ваква технолошка поддршка. Ако актуелните алатки не носат корист за конкретна работа, тоа се смета за важен наод, а не за неуспех. Инженер кој може прецизно да објасни каде тие решенија сè уште не помагаат, според компанијата, покажува токму проценка каква што се очекува.
Компанијата не вовела ограничувања за потрошувачката на токени, но претходно затворила интерна ранг-листа откако било утврдено дека дел од вработените го манипулирале системот за подобар пласман.