Јужна Кореја му изрече казна од 20,8 милијарди вони, односно околу 15,5 милиони долари, на Apple поради правилата за плаќање во App Store. Компанијата добила и наредба да им овозможи на развивачите да поставуваат врски до надворешни начини на плаќање директно од своите апликации.
Одлуката ја донесе Корејската комисија за медиуми и комуникации, која оценила дека Apple и Google во практика ги насочувале развивачите кон сопствените системи за плаќање. Според регулаторот, тоа е спротивно на законот од 2021 година, донесен за да овозможи користење алтернативни платежни услуги во мобилните апликации.
И Google е опфатен со одлуката и добил повисока казна, од 42,9 милијарди вони, или приближно 32 милиони долари. Двете компании дозволувале трети платежни услуги во апликациите, но притоа наплаќале провизија од 26 проценти и ограничувале одредени функции.
Комисијата смета дека ваквите услови ги правеле алтернативните методи помалку привлечни за развивачите и ги поттикнувале да останат со платежните системи на Apple и Google. Дополнително, забраните или ограничувањата за надворешни врски за плаќање им оставале помалку избор на развивачите кои сакале корисниците да ги упатат на други начини за завршување на трансакцијата.
Регулаторот наложил двете компании да ги подобрат и постапките за преглед и одобрување на апликациите. Во истрагата било утврдено дека некои прегледи биле одложувани без јасно објаснување за причините и без информација кога процесот ќе продолжи.
Посебен дел од наодите се однесува на Apple. Комисијата утврдила дека компанијата наплаќала повисоки провизии од јужнокорејските развивачи во споредба со развивачи од други пазари, во периодот од 2015 година до јануари 2023 година.
Apple не се согласува со одлуката и разгледува правни опции. Од компанијата наведуваат дека нивните правила се усогласени со јужнокорејското законодавство, како и дека системот за плаќање во App Store служи за заштита на корисниците од измами.