T-Mobile не планира да му отстапи дел од својата мрежна инфраструктура на Starlink за потенцијална мобилна услуга. Извршниот директор Срину Гопалан смета дека сателитската технологија не е споредлива со решенијата што операторот веќе ги користи за обезбедување интернет-пристап.
SpaceX неодамна ги претстави амбициите за развој на напредна мобилна мрежа базирана на сателитите Starlink. Но, за ваква услуга не се доволни само сателити: потребни се и копнена инфраструктура, како и доволно радиофреквенциски спектар. Токму затоа, Starlink наводно разгледувал модел на виртуелен мобилен оператор, односно услуга што би работела преку мрежата на некој од големите американски оператори.
Покрај T-Mobile, и Verizon и AT&T не ја прифатиле можноста за вакво партнерство. Според Гопалан, сателитскиот пристап носи дополнителни ограничувања, меѓу кои е и големината на покриеноста што може да ја обезбеди еден сателитски сигнален сноп.
T-Mobile како алтернатива го истакнува фиксниот безжичен пристап, познат како FWA. Оваа услуга комбинира рутер со 4G или 5G конекција и најчесто се користи за испорака на широкопојасен интернет до домови и други фиксни локации без потреба од оптички кабли. Таа има важна улога во руралните и потешко достапни подрачја, но се користи и во градовите.
Од компанијата велат дека приближно две третини од нивните FWA корисници доаѓаат од густо населени урбани средини. Според нивната процена, во овие подрачја сè уште има значителен потенцијал за раст, па не гледаат јасна деловна или технолошка корист од интеграција со сателитски оператор.
Одбивањето на трите големи оператори може да го усложни почетниот развој на мобилната услуга на Starlink. SpaceX, сепак, има планови да лансира уште 15.000 сателити, да закупи 80.000 локации за базни станици и потенцијално да поставува мобилни базни станици на постојните Starlink антени. Таквата инфраструктура би можела со време да му овозможи посамостоен настап на мобилниот пазар.