Следната голема верзија на Bluetooth би требало значително да ја поедностави репродукцијата на поквалитетен безжичен звук. Bluetooth Special Interest Group најави Bluetooth High Data Throughput, односно HDT, технологија што ќе биде дел од Bluetooth 7.0 и ќе поддржува lossless и аудио со висока резолуција без потреба од посебни кодеци.
Денес, за пренос на lossless или hi-res музика преку Bluetooth најчесто е неопходна поддршка за кодеци како Qualcomm aptX или Sony LDAC. И изворот на звукот, како телефонот или таблетот, и уредот што репродуцира, како слушалки или звучник, мора да го поддржуваат истиот кодек. Во спротивно, врската се префрла на поосновен аудиоформат.
Пазарот дополнително го усложнува големиот број достапни кодеци. Постојат најмалку 11 безжични аудиокодеци, а нивната достапност се разликува меѓу производители, модели и региони. iPhone, на пример, не поддржува aptX или LDAC. Според Sennheiser, помалку од 16 проценти од актуелните смартфони имаат поддршка за aptX Adaptive, додека aptX Lossless е достапен кај помалку од еден процент од нив.
Кај одредени модели на Samsung ситуацијата зависи и од пазарот на кој се продаваат. Во некои региони телефоните користат процесори на Samsung наместо Snapdragon чипови со поддршка за aptX, па и можностите за Bluetooth аудио не се секогаш исти.
Со HDT, поддршката за поквалитетен звук би станала основен дел од Bluetooth, доколку и телефонот и аудиоуредот користат Bluetooth 7.0. Новата технологија треба да донесе и побрз пренос на податоци, поголем капацитет, подобра енергетска ефикасност и посигурна врска.
Максималниот поддржан битрејт е 7,5 Mbps, речиси четирипати повеќе од Bluetooth LE. Bluetooth SIG наведува и подобрувања за повеќеканален surround звук и просторен звук.
Првите уреди со Bluetooth HDT се очекуваат на почетокот на следната година, а дел од нив би можеле да бидат претставени на CES во јануари.