Голем број постари Lenovo ThinkPad лаптопи од корпоративни флоти завршуваат на пазарот за половна опрема со заклучен BIOS. Причината е supervisor лозинка, безбедносна мерка што компаниите ја поставуваат на службените уреди, но често не ја предаваат кога лаптопите се отпишуваат.

Таквите модели обично се продаваат по многу ниска цена, бидејќи купувачите немаат целосен пристап до нивните поставки. Во дел од случаите, уредите завршуваат како електронски отпад, иако хардверот сè уште е функционален. Сега, туторијал објавен од каналот Rebooted by Hileeq го приближува веќе познатиот метод за отстранување на заклучувањето до поширока публика.

Постапката е наменета за ThinkPad модели со Intel процесори од четвртата до осмата генерација. Нејзината основа е евтин CH341A програматор, кој се поврзува со друг компјутер преку USB и служи за читање и запишување на содржината од EEPROM, односно SPI flash меморијата на матичната плоча.

Прво се извлекува копија од BIOS-от и се зачувува на вториот компјутер. Потоа, со алатката NeoProgrammer се применува автоматско закрпување, базирано на претходно објавен метод од заедницата за електронски поправки. Изменетиот BIOS се запишува назад во лаптопот, по што со неколку чекори при стартување се отстранува лозинката зачувана во Embedded Controller, посебен контролер задолжен и за безбедносни податоци.

По завршувањето, може повторно да се врати оригиналната BIOS содржина, но без активната supervisor лозинка. Методот се потпира на слабост во начинот на кој фирмверот и соодветниот драјвер на Lenovo овозможуваат пристап до емулирана EEPROM меморија. Во тој простор се наоѓа и податокот за лозинката на Embedded Controller.

Самата техника не е нова. Претходни верзии на решението се појавиле на форуми за поправка, а подоцна биле анализирани и во академска работа за безбедност. Новиот туторијал, сепак, ја претставува постапката во поедноставена форма и покажува дека за дел од старите ThinkPad модели не е потребна скапа специјализирана опрема.

Со оглед дека станува збор за генерации кои и натаму можат да бидат корисни за основна работа, ваквиот пристап може да придонесе повеќе исправни лаптопи да останат во употреба наместо да бидат фрлени.