Голем прекин на услугите на Microsoft 365 трае повеќе од 12 часа и им создава сериозни проблеми на организации што се потпираат на платформата за е-пошта, состаноци и работа во облак. Најпогодена е Exchange Online, а засегнати се и Microsoft Teams, cloud PC услугите и низа други хостирани сервиси што зависат од Exchange Online и е-поштата.
Проблемот почнал во четврток околу 18 часот по UTC. Корисниците пријавувале неможност за пристап до е-пошта, приклучување на Teams состаноци и целосно користење на дел од услугите во пакетот Microsoft 365. Сервисите што не се поврзани со Exchange Online останале достапни.
Microsoft првично го поврзал прекинот со проблем поради кој серверите не ги минувале автоматизираните проверки на исправност и поради тоа станувале недостапни. Компанијата почнала со корективни активности, но подоцна признала дека тие не го донеле очекуваното олеснување.
Во обид да ја врати стабилноста, Microsoft работи на зголемување на инфраструктурниот капацитет во регионите што повторно се активираат, како и на анализа на сообраќајот и насочувањето на мрежните барања. Дел од промените донеле само делумно закрепнување во одредени региони, без трајно подобрување на услугите.
Компанијата се соочува и со дополнителна пречка при зголемувањето на капацитетот. Виртуелните машини што треба да помогнат во намалување на оптоварувањето остануваат во проблематична состојба, поради што измените не се синхронизираат како што е планирано.
Microsoft продолжува паралелно да испитува повеќе можни причини за невообичаениот пораст на сообраќајот и за проблемите со позадинските сервери. Тимовите внимателно ја проверуваат погодената инфраструктура и ефектите од секоја поправка пред пошироко да ја применат.
Според достапните информации од статус-ажурирањата, Microsoft не пронашол индикации дека инцидентот е предизвикан од злонамерна активност. Сепак, нема најава за точен рок кога сите засегнати услуги ќе работат нормално.