Германската компанија Quantum Systems соопшти дека нејзините беспилотни летала повторно се користат, откако сајберинцидент доведе до привремено приземјување на дел од флотата на германските вооружени сили.
Компанијата навела дека нападот го забележала кон крајот на октомври и го пријавила до надлежните институции. Според Quantum Systems, заканата била ставена под контрола со брза реакција на нејзините ИТ и безбедносни тимови, во координација со властите. Од компанијата оценуваат дека инцидентот не претставува ризик за операторите и крајните корисници на нејзините беспилотни системи.
Причината за мерката на Бундесверот, според информации објавени од Der Spiegel, бил малициозен софтвер откриен во надградба за QBase. Станува збор за програмата на Quantum Systems што се користи за планирање мисии, следење летови и обработка на податоци од копнена станица.
Наводно, спорната надградба стигнала до сервери на германската војска и други корисници, но немало директна зараза на самите дронови. Quantum Systems посочила дека Бундесверот бил единствениот клиент што ги приземјил системите како превентивна мерка.
Компанијата тврди дека нејзината флота функционира нормално на глобално ниво, вклучително и во Германија. Германското Министерство за одбрана не коментирало за нападот ниту за деталите околу наводно погодената софтверска надградба.
Quantum Systems е основана во 2015 година и со години испорачува дронови за украинските воени напори. Германскиот канцелар Фридрих Мерц неодамна најави финансирање за неколку десетици илјади пресретнувачки дронови на компанијата како дел од зимскиот пакет помош за Украина.
Новите летала треба да се произведуваат во Украина и да ги надополнат системите за пресретнување што веќе се користат на фронтот. Во јули Quantum Systems објави инвестициска рунда од 1,2 милијарди долари, со која вредноста на компанијата беше проценета на околу 8 милијарди долари.