Најавата на Илон Маск дека Tesla ќе го прекине производството на Cybertruck во Gigafactory Texas околу средината на следната година предизвика незадоволство меѓу најверните сопственици и симпатизери на електричниот пикап. Дел од нив бараат појасно објаснување за одлуката, особено бидејќи компанијата планира да го искористи производствениот капацитет за поголемо производство на автономниот Cybercab.
Cybertruck пристигна на пазарот во ноември 2023 година, а неговото повлекување би значело крај на моделот помалку од четири години по почетокот на испораките. Во заедниците на сопственици се појавија грижи за достапноста на резервни делови, сервисната поддршка и понатамошниот развој на додатоци од други производители.
Мајкл Голдман, администратор на Facebook-групата Cybertruck Owners Only со повеќе од 82.000 членови, вели дека добива бројни пораки од вознемирени сопственици. Тој го користи Cybertruck во градежниот бизнис и не сака возилото да остане само колекционерски примерок. Размислувал и за купување втор модел како замена во иднина, но се откажал откако цената на Cyberbeast пораснала за околу 8.000 долари.
Дел од купувачите сè уште не знаат дали нивните нарачки ќе бидат исполнети. Маск навел дека Tesla можеби ќе мора да врати депозити на голем број клиенти бидејќи побарувачката е поголема од производствениот капацитет. Во исто време, Tesla продолжува да прима нарачки за поскапиот Cyberbeast, чија цена е 109.990 долари.
Трој Микхоф, познат меѓу љубителите на Tesla како Cybertruck Guy, започнал симболична петиција со која се бара преиспитување на одлуката. Таа досега собрала повеќе од 5.000 потписи. Според него, Tesla не направила доволно за моделот преку намалување на цените, рекламирање или понуда на продолжувач на досегот.
Незадоволството не е само поради самиот Cybertruck. Сопствениците сметаат дека Tesla сè повеќе се насочува кон автономен превоз, додека ги занемарува купувачите кои сакаат лично да поседуваат и управуваат со возило што може да превезува семејство, алати или товар. По укинувањето на Model S и Model X претходно годинава, понудата на Tesla за потрошувачите дополнително се стеснува на Model 3 и Model Y.