Microsoft ќе ги укине People, Files и Calendar Companion, трите придружни Microsoft 365 апликации за лентата со задачи во Windows 11. Тие ќе престанат да функционираат на 16 декември, 14 месеци откако беа воведени.

Апликациите не беа дел од секоја инсталација на Windows 11. Microsoft ги додаваше автоматски кај уреди управувани од работодавач, на кои корисниците имаат комерцијална лиценца за Microsoft 365 или Office 365. Затоа, корисниците на Windows 11 Home во најголем дел воопшто не ги добиле.

Компанијата во објавата за повлекувањето не навела конкретна причина за прекинот. Станува збор за алатки кои нудеа побрз пристап до дел од веќе достапните функции во екосистемот на Microsoft 365 и Windows.

People Companion служеше за брзо пребарување контакти и колеги во компанијата. Преку неа можеше да се започне Teams повик, да се провери статусот на достапност, да се видат споделени датотеки, организациската поставеност, профили и вештини на одредено лице. Корисниците можеа и да обележат важни контакти за да останат прикажани на врвот на листата.

Files Companion овозможуваше пребарување на Office датотеки со клучни зборови, филтрирање по тип на документ и создавање линкови за споделување со соработници. Calendar Companion, пак, носеше преглед и уредување на календарот од Microsoft 365, пребарување на настани, копирање линкови за состаноци и приклучување кон нив.

За функциите на Calendar Companion, Microsoft ги насочува корисниците кон Outlook за Windows, кој вклучува делови за е-пошта, контакти и календар. Teams останува алтернатива за пораки, видеоразговори и преглед на календарот. За пронаоѓање и споделување документи може да се користат пребарувањето од Start менито во Windows или OneDrive, достапен како десктоп апликација и преку прелистувач.

На службено управуваните компјутери, отстранувањето најверојатно ќе го изврши ИТ-администраторот. Другите корисници можат рачно да ги деинсталираат преку Settings, во делот Apps и Installed Apps, со пребарување за Microsoft 365 companions.

Со отстранувањето нема да се избришат податоци, бидејќи тие се чуваат во услугите SharePoint Online и Exchange Online, а не во самите придружни апликации.