Малите и средните бизниси во Обединетото Кралство сè почесто се соочуваат со кибер-инциденти и комерцијални измами, а проблемот е поизразен отколку на глобално ниво. Според истражување на Gallagher, 83% од британските компании биле погодени од ваков инцидент во изминатите 12 месеци. Глобалниот просек изнесува 75%.

Повеќе од половина, односно 57% од испитаните британски деловни лидери, сметаат дека обидите за киберкриминал се зачестени во споредба со претходно. Сепак, најраспространетата форма на криминал не доаѓа нужно однадвор.

Кражбата и нечесното однесување од страна на вработени биле пријавени кај 31% од компаниите, што ги прави најчестиот вид инцидент во истражувањето. Извештајот посочува дека внатрешните измами можат да останат незабележани со години, додека многу организации најголем дел од заштитните мерки ги насочуваат кон надворешни закани.

Меѓу почестите надворешни напади се измамите со кои вработените се наведуваат да споделат чувствителни информации или да префрлат средства. Такви случаи пријавиле 26% од бизнисите. Платежната измама и компјутерската измама погодиле по 25% од компаниите.

Финансиската штета не е мала. Просечната проценета годишна загуба кај погодените бизниси надминува 115.000 фунти. И покрај тоа, само една третина, или 33%, имаат посебно осигурување за комерцијален криминал што би покрило вакви загуби. Дополнителни 29% од компаниите ги организираат своите финансии така што можат самостојно да поднесат дел од штетата, наместо целосно да се потпрат на осигурување.

Проблем претставува и брзината на откривање. Три од пет британски бизниси навеле дека им биле потребни повеќе од 24 часа да утврдат дека станале жртва на измама, додека кај 19% тоа траело најмалку еден месец.

Gallagher препорачува компаниите редовно да ги преиспитуваат осигурителните полиси според реалната вредност и начинот на работа на бизнисот. Паралелно, потребни се посилни внатрешни контроли, проверка на банкарски податоци, одобрување на плаќања и поголема сајбер-безбедносна свест кај вработените.