Xiaomi ги претстави смартфоните 18 Pro и 18 Pro Max, чија главна особеност е малиот екран на задната страна. Покрај вообичаените известувања, контроли и преглед на камерата, новата генерација воведува можност корисникот со текстуален опис да создава едноставни интерактивни мини-апликации за овој дисплеј.
Станува збор за функции слични на виџети, а не за целосни мобилни апликации. Корисникот може да опише што сака да прави мини-апликацијата, по што телефонот се обидува да ја состави. Xiaomi најавува повеќе од 50 подготвени мини-апликации при почетокот на продажбата. Идејата е задниот екран да добие повеќе специфични функции без развивачите посебно да ги приспособуваат своите апликации за неговите мали димензии.
Во пракса, создавањето вакви алатки бара интернет-врска и може да биде побавно. При тестирањето, системот не секогаш ги следел точно зададените насоки, а посложените барања тешко се претворале во функционална мини-апликација.
Xiaomi 18 Pro има главен екран од 6,40 инчи и заден екран од 2,7 инчи. Кај 18 Pro Max, предниот дисплеј е 6,9 инчи, а задниот пораснал на 2,9 инчи. Задниот панел користи иста технологија како главниот екран, со максимална осветленост до 4.000 нити и стапка на освежување до 120 Hz. Екранот и камерите се покриени со едно Gorilla Glass Victus стакло.
Задниот дисплеј може да служи како визир при фотографирање со главните камери, а автоматски преминува на ултраширок приказ кога ќе препознае три или повеќе лица во кадарот. Поддржани се и Spotify, YouTube Music и Google Maps, како и опција за прикачување текст, фотографии, QR-кодови и карти за патување.
Двата модели добиваат камери со два сензори од 200 мегапиксели и Leica Summilux леќи. Главната камера има оптичка стабилизација, додека перископската телефото-камера нуди 3,2-кратно оптичко зумирање. Присутна е и ултраширока камера од 50 мегапиксели.
18 Pro работи со Snapdragon 8 Elite Gen 6 и 12 GB RAM, батеријата е 6.000 mAh со полнење до 90 W. Pro Max користи Snapdragon 8 Elite Extreme Gen 6, до 16 GB RAM и батерија од 7.050 mAh со полнење до 100 W. Моделите ќе се продаваат и во Велика Британија и делови од Западна Европа, но не и во САД.
