Insta360 претстави нова функција за своите 360-степени камери која од обична снимка може да создаде интерактивна тридимензионална верзија на снимен простор. Функцијата се вика Spatial Capture и прво пристигнува со новата Insta360 X6, но ќе биде достапна и за сопствениците на моделите Insta360 X5 и Insta360 X4 Air.
Наместо 360-видеото да се гледа само како панорамска снимка, по обработката корисникот ќе може виртуелно да се движи низ просторот и да го разгледува од различни позиции и агли. Така, снимената просторија, продавница, студио или локација од патување станува дигитална сцена низ која може да се истражува.
Технологијата зад функцијата е 3D Gaussian Splatting, односно 3DGS, пристап кој создава тридимензионална сцена од повеќе фотографии или видео-кадри. Вообичаено, ваквата постапка бара намерно снимање на околината од голем број агли и дополнителен специјализиран софтвер. Кај Spatial Capture, 360-камерата веќе ја бележи околината во сите насоки, па доволно е корисникот да помине низ просторот додека снима.
За создавање една сцена е потребно 360-видео долго до две минути. Корисникот потоа ја избира снимката во делот Spatial Capture во апликацијата Insta360 и ја активира обработката. Таа се извршува во облак и, според компанијата, вообичаено трае меѓу еден и два часа.
По завршувањето, сцената може да се разгледува преку контроли на допир, виртуелен џојстик или со движење на телефонот преку неговиот жироскоп. Достапна е и можност за поставување сопствени движења на камерата и нивно извезување како стандарден видеозапис.
Интерактивната сцена може да се сподели и преку линк, при што примачот нема да треба да инсталира дополнителна апликација за да ја отвори. Insta360 како можни примени ги наведува зачувувањето на важни места, туристички локации и привремени изложби, како и изработка на виртуелни верзии на мали бизниси, продавници и креативни студија.
Spatial Capture најпрво ќе биде достапен во САД од 28 септември 2026 година. Корисниците ќе можат бесплатно да генерираат до четири 3D сцени месечно.