OpenAI очекува од 2026 до 2030 година да потроши 278 милијарди долари повеќе отколку што ќе оствари приходи, покажуваат проекции од презентација што ја видел Financial Times. Главната причина за ваквата финансиска слика се планираните вложувања во пресметувачки ресурси, центри за податоци и придружна инфраструктура.
Компанијата предвидува приходите да пораснат од 36 милијарди долари во 2026 година на 350 милијарди долари во 2030 година. Во целиот период до крајот на деценијата, вкупните приходи би достигнале околу 840 милијарди долари. Сепак, само за пресметувачки капацитети и инфраструктура се планирани расходи од приближно 856 милијарди долари.
Покрај тоа, OpenAI очекува дополнителни 262 милијарди долари трошоци за други потреби. Како резултат, компанијата прогнозира акумулиран негативен слободен паричен тек од 278 милијарди долари во петгодишниот период. Иако сумата е исклучително висока, таа е пониска од претходната проценка од мај, кога се очекуваше негативен слободен паричен тек од 305 милијарди долари.
За споредба, проектираниот минус е нешто помал од расходите на австриската влада во 2024 година, кои изнесувале 286 милијарди долари, а е поголем од годишните државни расходи на Индонезија и Норвешка, според податоци на Меѓународниот монетарен фонд.
Финансирањето на ваквата експанзија ќе бара нов капитал. OpenAI во март обезбедила 122 милијарди долари, но сегашниот финансиски модел покажува дека тие средства би можеле да бидат исцрпени во 2028 година. Компанијата веќе разговара за нова голема инвестициска рунда.
OpenAI, чија последна проценета вредност изнесува 852 милијарди долари, наводно разгледува финансирање при вреднување од 1,2 билиони долари, додека од кругови блиски до компанијата посочуваат дека се бара и повисока проценка.