Стартапот за сајбер-безбедност Reco обезбеди 55 милиони долари ново финансирање, во период кога сè повеќе компании развиваат и воведуваат автономни софтверски агенти во своите деловни системи. Со инвестицијата, вкупно собраниот капитал на компанијата достигнува 140 милиони долари.
Финансирањето следува по рундата Series B од 30 милиони долари, објавена во февруари. Во новата инвестиција учествувале AT&T, преку својот инвестициски огранок, како и Forestay и Quadrille Capital. Reco не ја објави точната вредност на компанијата, но нејзиниот извршен директор и коосновач Офер Клајн посочил дека таа е повеќе од двојно повисока во однос на вреднувањето по февруарската рунда.
Reco првично се фокусирал на софтвер за мапирање и заштита на SaaS-платформи и поврзани системи. Компанијата сега го проширува пристапот со платформа што ги поврзува агентите со апликации, корисници, сметки и дозволи. Целта е безбедносните тимови да добијат појасна слика за тоа до кои ресурси може да пристапи секој агент и да ги ограничат непотребните овластувања.
Потребата од вакви алатки расте бидејќи организациите поставуваат агенти побрзо отколку што можат целосно да ги евидентираат и надгледуваат. Reco наведува пример со клиент од листата Fortune 100, кај кој неговата платформа открила 21.000 агенти за кои компанијата претходно немала евиденција. Кај голем клиент од финансискиот сектор, пак, бил пронајден агент поставен од поранешен вработен, со пристап до Salesforce и можност за споделување податоци со домен што компанијата не можела да го види.
Пазарот веќе привлекува бројни компании со различни пристапи: проверка на алатките што ги користат агентите, контрола на пристапот до податоци, следење на уредите на кои работат и откривање неовластена употреба. Reco се обидува да се издвои со постојната поддршка за SaaS-услуги и нивните вградени агенти.
Компанијата има повеќе од 100 клиенти, а околу 40 отсто од нејзиниот бизнис доаѓа од финансискиот сектор. Платформата поддржува повеќе од 280 апликации, додека новите интеграции, според Reco, може да се додадат за неколку дена. Новите средства ќе бидат наменети за вработувања, продажба, партнерства и поддршка за клиенти.