BBC Domesday Project, еден од најамбициозните дигитални проекти од 1980-тите, оваа година одбележува 40 години од своето објавување. По тој повод, британскиот Centre for Computing History во септември организирал настан со членови на оригиналниот тим што стоел зад системот.

Проектот бил замислен како современа верзија на средновековната Domesday Book, пописот на земјиште и имот составен по норманското освојување на Англија. Наместо пергамент, BBC во периодот од 1984 до 1986 година собрала огромна количина материјали на ласерски дискови. Во неговото создавање учествувале повеќе од еден милион луѓе, меѓу нив и голем број ученици.

Нивните прилози опфаќале текстови, фотографии, мапи и други податоци што давале слика за секојдневниот живот во Обединетото Кралство во тоа време. Содржината била распоредена на два LaserDisc медиуми: Community Disc и National Disc.

За користење на архивата бил потребен специфичен систем составен од BBC Master компјутер и Philips VP415 LaserVision плеер. Податоците се пребарувале и разгледувале преку графички интерфејс, а навигацијата на крајот била доверена на тракбол наместо на глушец. Според членовите на тимот, одлуката била донесена бидејќи тракболот бил попристапен за луѓе со потешкотии во движењето.

Развојот не поминал без притисок. Во јануари 1986 година, проектниот тим сè уште немал податоци подготвени за запишување на дисковите, па завршната подготовка ја реализирал за само неколку месеци. На проектот директно работеле околу 60 луѓе, со уште толку во надворешни тимови.

Системот бил наменет за училишта, библиотеки и универзитети, но високата цена ја ограничила неговата распространетост. Цената се проценува на околу 5.000 фунти, односно приближно 3.000 фунти со државни субвенции.

Иако проектот бил значаен како архива, неговата технологија брзо застарела. LV-ROM плеерите биле заменети со подостапни CD-ROM и DVD уреди, а самите дискови со текот на времето станале потешки за читање. Поради тоа, зачувувањето на содржината станало трка со деградацијата на медиумите.

Денес дисковите се зачувани во Internet Archive, каде што можат да се преземат. Ентузијастички проекти продолжуваат да работат на тоа искуството со оригиналниот систем повторно да стане достапно, овојпат без зависност од реткиот хардвер од 1986 година.