Polaroid ја претстави Mod, нова целосно аналогна инстант-камера што сака да го направи фотографирањето со филм поекспериментално. Наместо корисникот да се потпира на апликација или да навлегува во сложени поставки, камерата нуди четири креативни режими избрани преку прстен околу објективот.
Режимите се Split Shot, Double Exposure, Light Painting и Motion Freeze. Split Shot користи додаток што покрива половина од објективот, за на една фотографија да се спојат две одделно снимени половини. Double Exposure, пак, поставува две различни експозиции една врз друга во ист кадар, без употреба на тој додаток.
Light Painting работи со подолга експозиција и овозможува светлата во движење да остават траги на фотографијата. Motion Freeze исто така комбинира подолга експозиција, но блицот се активира на крајот. На тој начин светлата во движење може да останат заматени, додека главниот субјект да биде поостар.
Polaroid Mod има и посебен регулатор за осветленост, со кој може да се приспособи експозицијата. За фокусирање користи систем со два објектива, наменет за снимање одблиску и на поголема оддалеченост.
Камерата поддржува Polaroid i-Type и 600 филмови, во боја и црно-бела варијанта. Бидејќи станува збор за аналоген уред, нема екран на кој веднаш може да се провери резултатот. Фотографијата се исфрла по притискањето на копчето, а конечниот изглед се открива дури откако ќе се развие.
Токму тој процес е во центарот на идејата зад Mod. Креативните режими носат простор за неочекувани резултати, особено при двојни експозиции и светлосно цртање, каде што композицијата не може целосно да се предвиди однапред.
Polaroid Mod тежи 520 грама, се полни преку USB-C и со едно целосно полнење може да направи до 120 експозиции. Камерата веќе е достапна преку Polaroid по цена од 149,99 фунти или 169,99 долари, а кај други продавачи ќе пристигне подоцна.