ChatGPT и Perplexity за првпат се најдоа меѓу веб-страниците што најчесто ги посетуваат ботови за автоматизирано собирање податоци, покажува нова анализа на Decodo. Податоците укажуваат на промена во интересот на компаниите, кои покрај класичните пребарувачи, продавници и социјални мрежи, сè повеќе следат и што прикажуваат овие платформи.
ChatGPT е на третото место на листата и опфаќа 14 отсто од забележаната активност во анализата. Perplexity е на петтата позиција со 10 отсто. На врвот останува TikTok, со речиси една петтина, односно 18 отсто од регистрираните активности.
Според Decodo, компаниите порано главно собирале информации за тоа што пребаруваат корисниците на интернет. Сега расте интересот и за одговорите што ги добиваат корисниците на новите платформи. Тоа може да вклучува следење како се претставува одреден бренд, колку често се спомнува, како се споредуваат производи со конкуренцијата и кои извори се наведуваат во одговорите.
Од десетте најследени сајтови, дури седум се нови на листата. Покрај TikTok, повторно меѓу првите десет се Google и Amazon, кој е на осмото место. Во исто време, од листата отпаднале неколку големи услуги што биле присутни во 2025 година, меѓу кои Walmart, eBay и Airbnb.
Истражувањето го поврзува овој тренд и со пошироките промени во онлајн купувањето и следењето на навиките на потрошувачите. Социјалните мрежи остануваат важен извор за набљудување на интересите на корисниците, додека класичните малопродажни страници имаат помала застапеност во најновото рангирање.
Decodo очекува во следниот извештај меѓу првите десет да се појават и Gemini и Copilot. Компанијата предвидува и дека во иднина автоматизираните системи би можеле не само да ги читаат собраните резултати, туку и самостојно да одлучуваат кои податоци да се следат.