Продавачот на очила Hans Anders ја прекина продажбата на паметните очила Meta Ray-Ban во своите физички продавници и преку интернет во Белгија и Холандија. Одлуката е донесена на неопределено време, во период кога во земјата расте јавната и политичката дебата за снимањето со вакви уреди во јавен простор.
Hans Anders е дел од малопродажната група nexeye, која има повеќе од 400 продавници во Белгија и Холандија. Групата вкупно управува со 776 продавници, вклучително и во Германија, Австрија и Шведска, но Meta Ray-Ban очилата не се продаваат на тие пазари.
Од компанијата посочиле дека потегот следува по прашањата што се отвораат околу условите во кои може да се користи технологијата. Паметните очила со камера повторно се во фокус поради стравувањата дека луѓето можат да бидат фотографирани или снимени без да знаат и без да дадат согласност.
Посебно се истакнува загриженоста за злоупотреба на снимки од жени. Според извештај на NL Times, во последните месеци биле снимани стотици, а можеби и илјадници жени во Холандија без нивна согласност. Дел од материјалите наводно биле споделувани преку Telegram и на други штетни интернет-страници.
Холандската управа за заштита на податоците предупреди дека фотографии и видеа на лица што можат да се идентификуваат, направени со паметни очила, не смеат да се споделуваат без нивна дозвола. Сепак, контролата на ваквото правило во јавни простори останува сложена.
И организацијата за заштита на потрошувачите Consumentenbond најави можност за судска постапка против Meta доколку компанијата не ги усогласи очилата со правилата за приватност.
Meta наведува дека секој модел со камера има светлосен индикатор на предната страна, кој трепка при фотографирање или снимање. Компанијата исто така вели дека камерата се оневозможува ако индикаторот биде покриен или изменет.
Потегот на Hans Anders е меѓу првите јавни реакции од голем продавач на очила. Слични ограничувања веќе се појавуваат и во Обединетото Кралство, каде што ланецот пабови Wetherspoons забрани употреба на паметни очила во своите локали.