Американската непрофитна организација America by Design Foundation плаќа плати и трошоци за најмалку двајца луѓе ангажирани во федералната администрација, покажуваат документи до кои дошол WIRED. Организацијата е поврзана со National Design Studio, тело во рамките на Извршната канцеларија на претседателот на САД, задолжено за редизајн на државни веб-страници и дигитални услуги.

National Design Studio беше формирано во август 2025 година, како дел од иницијативата America by Design. Во изминатиот период, студиото работело на услуги како TrumpRx и RealFood.gov, а неодамна беше претставена и America.gov — платформа што треба да обедини повеќе државни услуги, меѓу кои даночни пријави и обновување пасоши.

Според документите, Amittai Groot и John Cafazza формално се вработени во America by Design Foundation, а се упатени на работа во Канцеларијата за управување со персоналот, позната како OPM. Двајцата се дел од National Design Studio, но нивниот ангажман е реализиран преку Intergovernment Personnel Act, закон што овозможува специјалисти од универзитети и непрофитни организации привремено да работат во владини институции.

За Groot, OPM треба да ѝ надоместува на фондацијата 13.691 долари месечно. Документите наведуваат дека ова не го покрива целиот негов надомест, па фондацијата ќе ги плаќа преостанатиот дел од платата и бенефициите. Кај Cafazza, фондацијата според достапните документи го покрива целиот трошок за неговото вработување.

Не е познато кој ја финансира America by Design Foundation, ниту со колкав буџет располага. Организацијата е регистрирана на 25 август 2025 година, само неколку дена по официјалното основање на National Design Studio, а даночни пријави сè уште не се достапни.

Како управен директор на фондацијата во документите е наведен James Burnham, поранешен правен советник во DOGE и актуелен главен правник во компанија поврзана со Илон Маск. Адресата на фондацијата во системот за јавни набавки е заведена како станбен имот во Александрија, Вирџинија, кој според проверката на WIRED се поврзува со Burnham.

Белата куќа не одговорила на прашањата за односите меѓу фондацијата, OPM и National Design Studio, а одговор не доставила ниту OPM.