Meta воведе забрана за реклами од ByteDance и за платени маркетинг-кампањи што водат кон TikTok на своите платформи. Мерката стапи во сила во четврток и важи во САД, Канада, Египет, Индонезија, Јапонија, Тајланд и Виетнам.
Забраната не се однесува само на рекламите што ги поставува ByteDance, туку и на огласувачи од трети страни кои промовираат TikTok или користат линкови што водат кон платформата. Meta ја претставува одлуката како вообичаена деловна практика, наведувајќи дека не е обврзана да обезбедува промотивен простор за конкурент чија цел е да привлече корисници надвор од нејзините апликации.
Потегот дополнително го заострува односот меѓу големите социјални мрежи. Тој следува откако TikTok престана да дозволува профилни линкови што отвораат или најавуваат корисници во други апликации за социјални мрежи, меѓу кои Facebook и Instagram.
Meta во последните месеци јавно бара TikTok и YouTube да воведат послични мерки за заштита на малолетниците на своите услуги. Компанијата претходно постигна голема спогодба со американски сојузни држави, по која треба да плати милијарди долари и да воведе дополнителни ограничувања за тинејџери на Facebook и Instagram.
Воедно, Meta водеше кампања во големи весници со повици конкурентите да усвојат слични безбедносни механизми. Компанијата го критикуваше TikTok и поради наводно отсуство од дел од состаноците на американските власти посветени на времето пред екран и безбедноста на децата.
Притисок врз TikTok доаѓа и од Европа. Европските регулатори летово оценија дека платформата не презела доволно мерки за заштита на малолетниците, при што би можела да се соочи со казна до шест проценти од годишните приходи.
Иако работењето на TikTok во САД сега е под контрола на заедничко вложување со мнозинска сопственост од американски компании, ByteDance останува значаен сопственик. Од TikTok засега има малку јавни реакции за спорот и новата рекламна политика на Meta.